老娘遊記 2018 (06 – 16 March) ＠ 關西 Day 7（1）白濱

 

 

老娘遊記 2018 (06 – 16 March) ＠ 關西 Day 7（1）白濱 

第二朝我一早起身去左浸多次之後就去食早餐

日本食早餐自助餐一定岩我食

因為一定有溫泉蛋、熱飯、味噌湯同紫菜（我係既野係好老餅！）

基本早餐要有既野佢都會有

日式醃菜、西式炒蛋煙肉腸仔、沙律生果，亦有人即製奄列（不過唔多好食！）

同埋有可以拎個網爐燒醃製三文魚，不過我唔食所以無拎

橙汁、鮮奶麥片一定有，佢個咖啡機最好係有外帶杯，比你食飽再斟杯咖啡番房

 

食飽左hea多陣其實仲好早，我預約左2點半車返大阪

所以就先check out，放低行李，坐巴士去多次Toretore市場，順便食埋lunch

（早知應該今日先bbq﹐真係蠢過隻豬！）

 

今日終於可以慢慢逛Toretore市場，因為其實佢都幾大（對比起和歌山個黑潮市場），

有分手信區同海鮮區，另外仲有食堂

不過我掛住行都無影相！

 

我地去到行左陣就有劏吞拿魚時間，梗係去睇啦！

雖然聽唔明佢講咩，但就咁睇佢表演已經好正！

佢一黎就切左個頭問有無人要！300yen ja（真係抵到喊）梗係比人秒殺喇！我拎到我都要呀！

 

之後就切魚鮫，好似500yen……（咩料！點解要咁平呀！）

果野真係好酸…望住d日本太太好興奮果樣…我都好想要呀！

 

跟住就開始切魚生，可惜佢切出黎d toro都好大件

兩個人一定食唔晒，我唯有揀一盒細細地既赤身叫過下口癮啦！

（因為某人唔鍾意食魚生，其實變相得我一個人食，真係好無癮！）

另外再買左三文魚籽飯同壽司就出去露天位置食野了！

 

食飽見時間差唔多就搭巴士返酒店，再轉長途車返大阪了！

回程大阪途中會停一停和歌山黑潮市場，不過去到都四點了

好多鋪都開始收，但目測成個場都幾搵笨，好細，d野價錢黎講toretore會平d

唯一吸引係市場外既海港，天氣好大大個太陽，好靚好舒服

不過我就咩都買唔落手就上番車了！