老娘遊記 2018 (06 – 16 March) ＠ 關西 Day 6（3）酒店篇：湯快ホテル千畳

 

老娘遊記 2018 (06 – 16 March) ＠ 關西 Day 6（3）酒店篇：湯快ホテル千畳

講下間酒店先！我係日本樂天book既！

 

2人1泊2食16800yen，早晚都係自助餐

本身搵過d資料同埋之前都住過集團式既溫泉旅館

但呢間都幾有驚喜！

佢係唔洗checkin既～一落shuttle bus就會比一個有你名既信封

有晒食飯時間同房匙，之後大家圍埋聽佢講一輪野就可以自己去揀浴衣，

之後自己上房！可以話無人serve你，但我鍾意咁幾自由自在，你唔明就可以去問人，佢地又有helpful咁答你！

 

酒店間房勁大，一入到去已經鋪好床

床前面有個茶几同電視，不過基本上我都係就咁住係榻榻米上面

旁邊有紙門，我以為係窗，一拉開原來外面仲有個廳仔

有雪櫃，洗水台等等，再旁邊先係窗，不過無景睇就一定架喇！

浴室同廁所係分開既！

浴室相當大，不過我都係落溫泉度沖涼，所以無咩點用過

講下餐點，佢既自助餐我都無咩期望，不過係入得口，正常味道

似香港平價既自助餐

魚生，天婦羅、燒牛肉、飯麵、沙律、熱葷、生果甜品雪糕一樣不缺

另外佢有個自助火鍋，不過係魚肉火鍋，我唔岩，無整到！

佢另外有個酒bar位，加錢就可以任飲，目測就紅、白，啤酒、sake都有既！不過我無飲實際就唔多清楚了。

 

食飽飽抖一抖就去浸溫泉，都係分大眾湯同露天浴場

佢個露天浴場係峽谷入面，所以一邊浸住溫泉就可以一邊望削壁同望海，同埋因為無咩燈光，睇星一流！

不過奇怪係佢個露天浴場無沖澡位，即係要係大眾湯沖完涼著番衫再行去露天位浸，呢度有d麻煩！

唔知係咪因為麻煩，同埋都凍，所以露天浴場我浸左幾次都無乜人

夜少少仲得番我一個！

仲比我睇到火尾流星！哈哈哈哈哈

（話說我自己一個浸住睇星星，突然望到有一粒光體慢慢劃過，

因為佢都行得幾慢，我最初都唔知流星，劃到半路佢突然好似劃火柴咁爆左條火尾，之後好快就劃過左！ 佢一劃過，我岩岩許完願！有幾個女人就除左衫入係衣帽間出黎了！（真可惜佢地睇唔到！））

 

浸完溫泉就去搵下有咩玩，佢大堂有幾部懷舊紅白機可以玩（呢個真係超有趣！）

 

另外溫泉出面有個遊戲室，有乒乓波檯同埋『免費』電動按摩椅同按摩床！

真係成張床訓上去開制會成個頂起你果隻

雖然每款有一部係壞既！

但因為唔多人玩，所以我地每款都有試！

著住浴衣浸完溫泉按下摩真係超級爽！

其實佢係有團客的，唔知係咪因為佢好刻意安排散客同團客分開時間食飯

所以大家活動時間唔同，我去每一個地方都唔係見到好多人

但當日成間旅館又full house架喎！真奇怪！