老娘遊記 2018 (06 – 16 March) ＠ 關西 Day 9（2）かに福 ＠大阪
老娘遊記 2018 (06 – 16 March) ＠ 關西 Day 9（2）かに福 ＠大阪
去完環球影城，加上連日的行程
其實真係攰到無咩胃口
但我又book左，唔可以no show架嘛！
結果都係去試左！
かに福十三駅附近，由梅田坐阪急電車一個站再行10分鐘度就到！都算係方便既！
呢間係專食松葉蟹同河豚既本地餐廳
價錢我覺得唔係特別平，揀佢係因為我想食蟹又想食河豚
而佢河豚既價錢都唔貴！可以一次過試晒兩樣梗係正啦！
去到發現真係完全無遊客（超正！）佢地真係淨係識日文，（都無咩問題既，this this this就得！）
餐廳既位係一個一個包廂咁，中間有布簾間開，私隱度好好（我好奇望下都好難睇到隔離食咩！）
我叫左三樣野，
一個蟹set:（5800YEN）
醋漬蟹鉗
蟹肉魚子飯
炭燒蟹件
蟹件涮涮鍋
雜炊
因為佢個蟹set係人頭計，唔可以叫一個set兩個人食，再叫多個set我地一定食唔晒，所以我另外再叫左河豚刺身（1500yen） 同河豚涮涮鍋
（1980yen），再另外叫野飲咁啦！
叫完野就算上左兩個前菜（每個300yen，一定要比的！）係東風螺冷盤
無咩特別！
之後河豚刺身，呢個得覺得都幾值得叫！佢唔只係得河豚肉，仲有皮刺し（將魚皮汆燙後再切細）同埋魚肝刺身，我大鄉里唔係好識食，一片片咁食河豚，口感彈牙而味淡（之後上網睇先知要幾片幾片咁食！），但點醋醬汁食又有另一番風味 。
魚皮口感很有趣，皮厚身，食落有d似食海蜇！
我最鍾意係魚肝，魚油豐富，齒頰留香，每一口都感覺人生難得！
我覺得單是魚肝已經值1500yen！
但其實河豚肝係好危險，最易中毒既部份！所以值得值得試要三思了！
某人不敢吃，我膽生毛一個人食晒！so far…都無事既！
之後就開始上醋漬蟹鉗，蟹肉魚子飯，無意外地好食﹐係魚子太多有d咸！
之後上炭燒蟹件，開頭我以為係刺身，一問之下係bbq，但佢話你當刺身食都可以！ 嘩！正～ 真係估佢唔到！我即時食左隻蟹腳，但無想像中好食
味鮮甜但肉淋身﹐一入口唔覺意就吞左了，連咀嚼都唔洗…但我嫌無乜咬口
都係乖乖地燒熟黎食！
之後就到蟹件涮涮鍋，配料有豆腐、菜、薯粉
但因為鋪頭開左暖熱，我剛又對住炭爐，加上我真係好攰
其實體力值已經見紅，我開始唔係好食得出咩味
而且日本既涮涮鍋係純昆布湯，即係無咩味
我只係記得肉質好鮮！同好飽
最後連個雜炊我都叫佢唔好上，摸住個肚同佢示意我真係好飽！
最後就係河豚涮涮鍋，日本人真係好細心同堅持，其實大家都係涮涮鍋
我食完個蟹，其實佢可以就咁放碟河豚落去
佢地成個鍋同我換左，新的昆布湯配河豚
但都係啦，我都係覺得無咩味，不過河豚煮熟左好彈牙
唔似魚，反而似田雞！呢樣係幾新鮮，如果我唔係0體力值應該會食得幾開心！
之後因為我唔要個雜炊，本身個set得一杯雪糕，佢比多杯我，個雪糕係自製杏仁雪糕，勁多杏仁，相當好食！
其實呢間一d都唔算貴，但如果比我再黎，我會選擇散叫，一黎我真係細食，二黎因為我想食蟹肉天婦羅！
沒有留言: