老娘遊記 2018 (06 – 16 March) ＠ 關西 Day 8（1）姬路神戶一日遊

 

老娘遊記 2018 (06 – 16 March) ＠ 關西 Day 8（1）姬路神戶一日遊

我到大阪果日已經係機場買左阪神電車・山陽電車姬路一日pass連機場到難波既單程飛（2000yen），

佢係南海電鐵的單程票出發果日起，八天內自由乘車券都有效，

我計過日子上係岩岩好！（不過有一點唔明，其實佢比我果張難波單程飛係無日子的（普通單程飛），

同1日自由乘車券都係分開比，除非佢規定我買呢個套票果日一定要用難波單程飛，

唔係佢點樣可以count到我8日？不過我無深究，因為我計左日子上我係ok的！）

 

 

今日一早就由酒店出發，先坐jr去難波，去松屋食早餐（又抵又好食！）

 

之後就坐阪神電車先去尼崎站再轉線去姬路！

坐車既時間拎左尋晚係天王寺買既huspy hreme既糖霜donut黎食

超級好味！勁幸福！

就算凍左就係咁正！（某人完全係一臉不屑咁望住我花癡咁既樣！）

 

去到姬路！梗係『又』要踩車啦！

呢次仲要係唔洗錢架！

係，真係唔洗錢就租單車，係姬路站出口附近有個姬路旅遊咨詢中心！

只要出示passport登記就可以免費租單車架喇！

不過佢係一定要你拎頭盔…但因為真係好樣衰，我出門口就塞左入袋

但超大舊，勁麻煩

同埋因為我地都算遲（去到10點），得番5架車，淑女車比人揀晒

得番公路車，最慘係佢係高跨車架，對於腳短既我係好痛苦

同埋佢個seat位就算較到最低，我腳尖都爭d掂唔到地！ （我知我矮！但我唔想架嘛！）我對於腳掂唔到地係極淆，有幾次爭d炒車！

所以真係要早d去揀車！唔係就會好似我咁，一路踩一路驚！

 

 

由車站踩車去姬路城只係一條直路10分鐘，目標就係前面！好快就到！中間就係商店街！好難蕩失路！

 

去到姬路城！個城就好宏偉，不過周邊…um……例牌全部都係『櫻花樹』

真係好蒼涼！

不過都好既，唔多人

買左姬路城加好古園套票，就入姬路城參觀

之前download左個姬路城AR apps，話有野玩，即刻開黎睇下啦

發現都幾流……其實係scan 個code，之後播片介紹，或者係會有一隻姬路城公仔同你合照…笑左！

 

 

我對城池呢家野就無咩研究，所以都係跟隊上上上…之後就落落落

都幾攰！反而我對主城池隔離千姬住果度有興趣d

因為行緊果時睇到佢同本多忠刻既愛情故事！

（話說千姬係德川家康個孫女，好細個就政治婚姻嫁左比豐臣秀吉個仔，之後兩家唔岩打仗，

豐臣秀吉個仔死左，千姬被救，返娘家途中見到有個男人好靚仔（話係一見鍾情，一定係好靚仔先會啦！），

即係本多忠刻，姬路城個城主！之後兩人就相愛，千姬就嫁左比靚仔，搬左去姬路城！

可惜本多忠刻好早就死左！千姬最後削髮為尼！）

有故事為背景去參觀，成件事就豐富好多了！ 畢竟係古代，真心相愛又一齊到既真係好少！

不過就算千姬同本多忠刻係相愛，佢都無得出街！拜個神求子都要係遙望個天滿宮，真係無陰公！