老娘遊記 2018 (06 – 16 March) ＠ 關西 Day 3– 嵐山（2）
睇個天雨就唔會停…嵐山仲有咩地方行？
我決定慢慢行上大覺寺！（忽左？！）
中間經過天龍寺…清涼寺…行左都幾耐下
我唔識寺廟，其實都好似差唔多
不過我幾鍾意清涼寺，無人！咁岩有人誦佛，係度靜靜地感受左陣！
平時聽到佛機誦佛係好煩燥！唔知點解果個環境聽到又會令你好平靜
之後行過左人地d田，又去睇下人地d民居，係腳軟之行唔郁之際終於到左大覺寺
買飛入去參觀，見到有個伯伯跪係度用布抹d木欄，佢真係慢慢移動一條一條去抹好仔細咁抹
我地用手摸摸四周d木欄，真係一粒塵都無！果下堅佩服﹐佢係咪每日都係重覆緊呢樣野？作為一個急燥既香港人…真係好難想像！
其實我對寺內既展品？印象唔深，想去大覺寺係因為想去望下佢個湖！
但因為落雨就行唔到出去（除左鞋），只係記得都幾大同埋保存得好好
出番黎因為真係腳軟就搭番巴士落渡月橋，望一望果個光禿禿既山頭
（我相信櫻花同楓葉季會好震憾同好靚，日本好多山頭都係！因為一路我見到好多都係光禿禿既）
因為天氣真係唔好！濕濕凍凍咁就回程返京都了
返京都後去左車站附近超市買左士多啤梨、雪糕啤酒後，就返民宿休息下
之後出發去河原町食晚餐，今晚想食迴轉，所以去左食もりもり寿し，不過就中左伏！
價錢我又覺得唔平……同元氣差唔多！記憶中比元氣貴d！
質素都同元氣差唔多……坐左落去叫左幾碟…計一計成三百幾蚊港紙
唔敢叫落去…（食完就賣單走了！ 所以唔推介，早知我寧願食拉麵或者食串燒好過了！
本來想有下場去食串燒，但真係攰了（懶勁咁行去大覺寺…但又唔知年紀唔細）
就打道回府，返到去七条！ 見到有間居酒屋﹐門口有人篤下篤下，眼尖既我一睇就知係章魚燒啦！ 即刻買番盒（300yen 6粒）返去送酒！
大阪既章魚燒同我食開有d唔同，係淋淋地既……但都好食既，同埋300yen抵食！所以之後晚晚都去買……
沒有留言: