老娘遊記 2018 (06 – 16 March) ＠ 關西 Day 5（2）–近江八幡

老娘遊記 2018 (06 – 16 March) ＠ 關西 Day 5（2）–近江八幡
食飽之後就出發行程
今日去某人家姐推介既近江八幡
佢話之前去睇櫻花好靚好舒服
又唔多人！
唔多人既地方我梗係去要啦！

上網見到話    jr站隔離有單車租，有人話只租本地人
我去到就即管博下
係可以租架，你拎住本passport 交低500yen就租到


雖然係無波車，但京都大部份都係平路，無咩上落斜，無波都相當好踩！
其實旅遊中心好好，教我地有咩景點好去（因為其實我都無咩點做過功課！）

但一踩上架單車，求其係google map set左個點就有理無理向前衝
先去左八幡宮神社……
 個渠蓋勁靚！


都係神社啦…
 
唔知係咪專幫小朋友祈福，見到有小朋友著住d靚靚既衫比屋企人抱住行黎行去！

之後去左八幡公園…um……我話櫻花季會幾靚既
因為佢成片斜坡都係櫻花樹，但我去時唔係櫻花季
所以成片斜坡都係……禿樹！
好蒼涼下（之後呢個情況經常發生！）

坐左幾分鐘…覺得好無聊，就閃左！
 
再踩去八幡堀，因為踩住單車我落唔到去行（有d後悔）
雖然兩旁都係禿既櫻花樹，但兩旁既古屋係幾有味道

我踩住車就咁經過d老街民居已經覺得自己好似穿越左～～
去完八幡堀，我以為近江八幡咁就完左！
但上網睇下，竟然見到附近有個不得了既地方 － La Collina
 
踩車過去只係半個鐘到，梗係唔好錯過啦！


其實La Collina係一個賣年輪蛋糕既地方
但成個地方建築都造得相當夢幻，一去到好似去左宮崎駿筆下既世界


用草皮鋪滿既屋頂，有個用鐵皮砌既貨廠，入面有架英國雙層巴士…
仲有個湖泊，周圍都係草地…超級舒服！雖然好多野都係人工造出黎…
只可以話……日本人真係好識做生意！

咁遠黎度，無可能唔買番一兩個蛋糕孝敬下老豆！
咁岩佢既年輪蛋糕保質期係一個星期，都仲趕得切返香港！

不過真係超多人排隊，排到腳軟終於買到！

仲食左佢個士多啤梨大福！ 日本cream加日本士多啤梨…係好難唔好食既！